1789 : Emrenerez Breizh kollet

Nozvezh ar 4 a viz Eost 1789 a lammas kuit an holl brientoù, forzh pe re e vefent :

- Ar brientoù hiniennel a aotrouniezh, a save da amzer ar c’hladdalc’helezh (tell war an holen, tailh,…), diamzeriet an holl anezho ;

- Ar brientoù proviñsel (a anver hiziv emrenerezh pe digreizennerezh) a zalc’he kont eus ar feuremglevioù a-ziforc’h a oa bet graet gant broadoù a oa dizalc’h gwechall, hag a oa ganto, e Breizh pergen, diforc’hioù gwirion a-fed yezh ha sevenadur da skouer. An Dispac’h Gall a reas ur gaou spontus da bobl ar Vretoned o nac’h dezho o gwirioù tra ma ranker anzav o doa doujet dre vras ar Rouaned C’hall ouzh emrenerezh ar vro…

D’an 22 a viz Kerzu 1789 ouzhpenn-se e voe diskaret rannadur melestradel henvoazel Breizh. Abaoe Nevenoe e oa bet melestret ar vro o kemer da ziazez ar seizh eskobiezh ha diwar neuze e voe rannet e pemp rannbarzh, pemp departamant na zalc’hont kont ebet da skouer eus gwirvoudoù yezhel kornog ar vro : Eskopti Landreger, dezhañ un hennadelezh hag ur rannyezh vrezhonek unvan a-walc’h a voe rannet etre daou departamant, hag eskopti Kernev etre tri departamant !