Folled, huñvreerion, ur strolladig-plouz, ur c'hartouron, un c'havailh, un irienn, un disujidigezh, un emsavidigezh, un taol-dispac'h. Diskennidi hon hendadoù a zo deuet diouzh Irwerzhon, Kembre, Kernev-veur, bro-Skos pe diouzh Enez-Vanav. Diskennidi omp eus ar vrezelourion o deus stourmet ouzh Caius Julius ; bugale ar voraerion wenedad faezhet dre ziouer a avel ; bugale omp d'an holl re o deus kemeret perzh en arme a oa aet war sikour Verkingetoriks e traped Alezia ; hêred omp eus ar sevenadur keltiek a gaver ennañ an Drouized a lide ar c'houlzioù-amzer paz ae an heol an deizioù da guzh. Diskennidi omp eus ar varc'heion o deus stourmet dindan urzhioù hor Roue Meur Nevenoe a-enep Karlez-Voal ; bugale vihan ar varc'heion o deus ambrouget an Dug Pêr Dreux lesanvet Brizhkloareg d'ar Goaziadeg da zifenn ar frankizioù. Diskenn a reomp eus kumpagnuned Gwilhom An Alouber a c'hounezas Bro-Saoz. Diskennidi omp d'ar servijerion feal a reas degemer mat d'an Dug Yann IV o tistreiñ eus e harlu. Bez ez omp - lorc'h a zo ennomp – diskennidi ar re en em gannas hag a varvas e emgann Sant-Albin-An-Hiliberenn. Bugale vihan ar re a servijas gant lealded an Dugez Anna. Diskennidi omp d'ar re a gemeras perzh e irienn Markiz Pont-Kaleg, d'ar re a yeas a-du gant ar Chouaned hag ar Vandeiz hag a voe fuzulhiet, a varvas e-pad an Droiad d'ar Gwalarn pe da geñver dilestradeg Kiberen, a vo dibennet gant ar Gwilhotin pe a c'houzañvas dindan an Dispac'h Gall. Diskenn a reomp eus ar re a zo skrivet o anvioù war monumantoù ar re varv, en hor c'hêrioù hag war ar maez, lazhadeget e Verdun war Hent an Itronezed. Diskenn a reomp diouzh ar re na zegemerjont ket an Dalc'hidigezh Alaman. Kerent bugale skoliataet e brezhoneg omp. Un dornadig tud omp, seizh diazezerion TUDJENTIL BREIZH / Kevredigezh Noblañsoù Breizh : Jakez, Emmanuel, Tepod , Olier, Huberzh, Florañs ha Loeiz.

Emmanuel, Nedeleg 2004